Sardi

Emanuele di Bartolo
dal libro "Annunnu ... vidennu ..." (1962)

 

Nt'a limma china 'e acqua, 'a gná Gatuzza
'i sardi (unicu pisciu d'i pezzenti)
va piannu e, ccu sverti movimenti,
stritti ntì jiti, 'i sventra e 'ri scapuzza;

e, subb'u chjanu 'e nu lippusu scannu,
a cuntrapilu, 'i gratta ccu 'ra lama
e nu curteddru, ppe cacciari 'a squama,
e nt'u vacilu, nfina, 'i va jettannu.

Fora 'a porta, lagnusa, è misa 'n fila,
'e gatti allupatizzi è na vrancata,
ccu 'ra cuda deritta, sunnazata
e ferma, comu fussa na cannila.

Ncuna, cchjù ardita, cerca d'allongari
subb'u scalunu 'a granca, 'mmenz'a carta
ddruvu Gatuzza 'i capi à misu 'e parta,
ppe 'ri potiri a l'urtimu jettari.

"Gattiddrà! "fa 'ra vecchia e, ccu 'ra mana
tutta mbrascata 'e rilucenti scardi,
recuperati tutti quanti i sardi,
'i va sciacqua, ccu cura, a 'ra funtana.

L'ogghju già fuma e vuddra nt'a fressura
chi Catarina, 'a figghja, ha preparatu
e d'u profumu 'e pisciu arriganatu 'u viculu, 'e nu capu a l'atru, ordura.

'A propositu 'e sardi, unn'á mai ntisu
diri d'a sarda vecchia o sia salata ?...
Bè! Certamente 'a megghia nnuminata
l'à chira fatta a l'usu cruculisu !

Misa, a solari, nta nu terzaluru,
ccu salu, pipu iuschentu macinatu,
ccu 'ra pracchja (ch'è pipu già nfurnatu
spaccatu a dui) e finocchju ppe 'd orduru ...

'a tèninu a suppressa, ccu nu pisu
(na petra tunna subb'a 'ru timpagnu
chi trasa ppe cuvèrchju nta l'argagnu)
e 'a fanu maturari ncunu misu.

Megghju ca nta nu piattu, 'a pó gustari
misa ccu 'd ogghju - a l'usu d'u vualanu -
nt'a coppareddra fatta a menzu panu...
Dicinu ca 'i malati fa sanari !

E 'd è daveru! Nfatti m'arricordu
ch'era malatu 'e tifu e s'era fattu,
ccu 'ra freva a dui misi e sulu lattu,
nu schelitru 'a bonanima 'e Libbordu!

E cchi ti fa ? Na vota si va leva,
quannu dòrminu tutti, 'e sira tardi ...
duna de mana e nu piattu 'e sardi ...
e 'u jurnu appressu l'è passata 'a freva !

Comune di Crucoli (KR) - Sito Ufficiale


     TWITTER  fACEBOOK

Via Roma, 6 - 88812 Crucoli (Kr) - Tel. (+39) 0962 33274 Fax (+39) 0962 33090 -
C.F. / P.IVA 00297210791 - Pec: protocollo.comunecrucoli@pcert.postecert.it

Sito Ufficiale: www.comune.crucoli.kr.it
  Statistiche

Bussola Pa

Note Legali

Privacy

 

HTML 4.01 Valid CSS
Pagina caricata in : 0.114 secondi
Powered by Asmenet